وشم

 تدوينة

لوحة فنية- وشم

لما رشدي أباظة في فيلم تمر حنة راح راسم البت تمر حنة علي صدره علشان يوثق قصة حبه ليها و لما خانته البنت تمر راح جايب زونفل (الممثل اللي مش عارفة اسمه) و راح شال الوشم بمية النار و معرفناش هو انكوي من ميت النار و لا انكوي من احساس الغدر و الخيانة أكتر

ساعتها ابتديت اتعلم عن الوشم...عن الحدوتة الي بتترسم علي الجسم

زي ما بنرسم في البورتريهات و الصفحات البيضا....البعض بيشوف ان صفحة جسمه ممكن تكون مساحة لأنه يوصل حدوتة شخصية بيه هو

الوشم اللي موجود في القري هو للحسد....او لمنعه بمعني أصح.....الناس بتتوشم علشان مصدقة انهم قاعدين باصين علي بعض و حاسدين بعض فلما تيجي تبصلي بعين ردية يقوم ايه الوشك يكسر شوعاع الحسد اللي هيفلق الحجر دوت....و بصراحة انا لغاية دلوقتي مش قادرة أفهم هي المجتمعات البسيطة ديت يا تري موشمومة بالتدين الفطري و لا لسه عايشة في مية الاناناس و لا هم ملحدين بس مش واخدين بالهم لأنهم في اوقات بيؤمنوا بيه كقوة عليا و خاصة في لحظات البؤس اللي مبتفارقهومشي و في معظم سلوكياتهم مؤمنين بكل حاجة إلا هو....ما علينا

الوشم اللي موجود في المجتمعات الاكثر انفتاحا....مساحة او فكرا بيكون علشان يوصل رسالة "تمرد" مش بتاعت مصر....تمرد علي القوانين السلطوية اللي بتتدخل حتي في جسمك و بتشوف ان من حقها شكله يكون ايه و تقولك انت تعمل فيه ايه بالظبطو علشان كدهوت اول حاجة بيعملها المراهق في المجتمعات المنفتحة المفتوحة ديت انه "يوشم" نفسه علشان يطلع لسانه لقوانين المجتمع الابوي دوت

الوشم في الخليج انا شفته ليه معاني الزينة لدرجة ان الستات بتموت بعضيها في الصالون علشان تعمل رسومات الحنا و استحالة تروحي فرح متلاقيش الوشومات رايحة جاية.....و الي بشوفها انها بدون معني حقيقي....مافيهاش قصة مجرد زيطة علي الايد و الرجل علي الفاضي....بيحاولوا يداروا بصخب الرسم "خواء" المعني في اي حاجة بيعملوها.....اهي عادة لازم نمشي عليها

اللي مهتم ممكن يتستمتع بقراية تاريخ الوشم في الحضارات القديمة و حواديته و هيلاقي حاجات مبهرة بصراحة تقولك يا تري المجتمعات البدائة لما بتتطور...الوشم بياخد أنهي شكل معاها

طيب الرغي دوت هيودينا علي فين

ان الوشم اللي بيترسم حدوتة علي الجسم.....بعض المجتمعات بتستحدث "أوشام" تانية توشم و توصم بيها الناس في مجتمعاتها و بتستحدث آليات فرز جديدة علشان تخليهم مميزين

أنا مش هقول ايه

انا هسيب كل واحد يركب حصان خياله و يدور علي ال"وشم" في مماراستنا اليومية

و هتلاقي ان كلنا بنقع في الغلط اللاارادي التصنيفي التعمدي الواشم لتصرفات الغير

الوشم و الوصم اللي بنلاقيه في خانة البطاقة

الوشم و الوصم اللي بنلاقيه في طريقة الزي

الوشم و الوصم اللي بنلاقيه و انت منين من بحري و لا من الصعيد

الوشم و الوصم اللي بنلاقيه و انت كلية ايه بقي يا تري

الوشم و الوصم اللي بنلاقيه في الحالة الاجتماعية

الوشم و الوصم اللي بنلاقيه في ...........

مش هقول.....كملوا انتو بقي

و دوروا علي الوشم....اللي ممكن جدا يكون حالة زينة مبهجة....او حالة تمرد عارضة و ممكن برضه يكون حالة وصم عجيبة بنفضل نفتت بيها الكيان الانساني لغاية ما نفصل "انسان" يشبهنا احنا و يشبه ال"وشم" اللي علي صدرنا علشان نبقي زي رشدي أباظة في الفيلم

شوية يحطه...و وشوية يشيله بمية النار

و برضه دي وجهة نظر...موشومة