مقالة منشورة على موقع "زائد 18" بتاريخ 25 يناير 2016
موقع زائد 18 موقع مصري شبابي شامل مستقل مخصص لنشر مقالات الرأي في المجالات المختلفة. يهدف لإتاحة منصة حرة للشباب للتعبير عن أرائهم دون قيود ودون تدخل من إدارة الموقع. يصدر عن مؤسسة زائد 18 للنشر.
لما شفت الهاشتاج عن المشاركة في ثورة يناير، وشوفت القصص اللي اتكتبت، وباراهن إن فيه غيرها أكتر لسه متشال، وفي يوم راح يطلع من شكمجية الحواديت ويتوثق كما يليق بـ”عبور” حقيقي يليق بجيل كامل تمّ تجهيله وتهميشه وتقزيمه لكنه انتصر، رغم الهزيمة المؤقتة، وتخطي كل محاولات الإنهاك والتركيع، بس للأسف لم يحظ بفيلم ملحمي يحتفظ فيه البطل برصاصة ويفضل يذلنا بيها طول عمرنا.
تابعت الهاشتاج بفضول وترقب، وأنا بقول لروحي: "هتروح فين يا صعلوك وسط الملوك".. الحقيقة إني ماكنتش موجودة في مصر وقت الثورة تحديدا، ومشاركتي كما سأرويها كانت هزلية وهزيلة لو هتتقارن بالأبطال المنسيين في ملحمة يناير.
لكن جملة الهاشتاج نفسها "أنا شاركت في يناير"، وقت قراءتها لازم تلاقي فلاش باك نوّر في دماغك، وتسرح في خمس سنين فاتوا.. ركبت فيهم الحلزونة في أفكارك واتشقلبت كام مرة و كام مرة عافرت علشان ترجع تتوازن وتنتصر للي اطمأن قلبك ليه.. ذكرى يناير مش هتكون زيارة موسمية لتدشين العادات المصرية الأصيلة في زيارة القرافة وقراءة ما تيسر من مانيفستو الخائفين على روح الثورة، لكن هتكون اللحظة اللي بنقف فيها ونسأل: يعني إحنا دلوقتي فين؟!
في لحظة يناير الأولى، كانت مشاركتنا، وعدد من الأصدقاء، عبارة عن فيديوهات بنركب فيها إيفيهات أفلام مصرية مشهورة على خطابات مبارك، واللي انتشرت بشكل أوسع وبخيال أصيع فيما بعد باسم السف والألش على السوشيال ميديا.
كان نفسي أقول إننا كنا بنعمل ده بوعي، أو علشان عندنا تاريخ نضالي عظيم، فاختيارنا للسف والقلش هو نوع مبتكر من النضال والكفاح وشوية حاجات فوق بعض، لكن الحقيقة أن الطريقة دي لو اعتبرناها يعني مقاومة، كانت الطريقة اللي تشبهنا وقتها.. مجرد صعاليك عابرين اختاروا إنهم مش عايزين ينتموا للبلد دي، ونفذوا قرارهم بالفعل جغرافيا، وابتدوا يتعاملوا مع كل ما يتعلق بيها أو بناسها بمزيد من التسخيف والتضحيك، وكأننا ماكناش لاقيين غير القشرة دي اللي تربطنا بيها.
في فترة صناعة الفيديوهات، كنا محاطين بجرعات مكثفة من أهالينا "امشوا جنب الحيط"، واللي بالمناسبة أهالينا ذاتهم مشيوا جنب الحيط طول الخمس سنين، لغاية ما ما شاء الله باختياراتهم، لبسونا في الحيطة نفسها.. ده إن وجدت يعني.
لحظة يناير اللي شارك فيها وعاشها وآمن بيها، هيعرف إن حلاوتها إنك اكتشفت إن فعليا ماكنش فيه حيطة علشان نتدراى جنبها أو نخبي عجزنا وقلة حيلتنا وغضبنا من وضع ماكناش محتاج تحليل سياسي مخضرم، أو بعد اقتصادي حلزوني علشان نقول: “ميصحش كده بأثر رجعي”.. ماكنش فيه حيطة من الأساس، وده كان الاكتشاف الأهم ليناير.. لما الناس اللي كانت –حرفياً- مش عارفة بعض، مشيت خطوة فوق خوفها، وخلعت حيطتها الوهمية من لغلوغها، ونزلت بيها علشان تشارك في ثورة يناير، ولقت نفسها بتضم على بعض في ميدان واحد، علشان تنادي بعلو صوتها: “ارحل”.
لو جرينا الخط دلوقتي من لحظة السف على النظام متمثلا في رفع الجزمة في وش مبارك العكر، ومطالبته بالرحيل، اعتقد إننا في لحظة ذهبية تانية للسف على نفس النظام باختلاف البدلة، مع الحفاظ على صبغة الشعر كاختيار واع للمقاومة والنضال بقى (لو يعني من نفسي هاستخدم المصطلح)، لكن المرة دي مش هيكون بالاحتشاد في الميادين، ولا هيكون برفع فرد الجزم القديمة، ولا هيكون بالحزق بشعارات اكتشفنا بعد كده إن واحد من أخطائنا الواجب الاعتراف بها إننا كنا بنحزق بيها، بس كل واحد كان مركب فردة جزمة في دماغه، وبيفسرها بطريقته، وعلى حسب قاموس معسكره اللي عايز ينتصر ليه.
ويمكن ده أهم ما في يناير 2011 "إحنا ماكناش عارفين بعض.. بس ضمينا على بعض، وبعد ما عرفنا بعض، مابقناش طايقين بعض"، وغالبا هيفضل ده البندول اللي بيتأرجح بين خانات المكسب والخسارة، لأننا لسه مطورناش نظام يشبه ثورة هتسمح لأفرادها أنهم يسدوا كل فجوات الجهل ويحازوا الصفوف ويتعايشوا، بل الأنكى أفرادها اختاروا أوعر الطرق للوصول لده بعد تكويم فواتير من خسائر فادحة.
الوضوح اللي معظمنا مر بيه في لحظة يناير الأولى 2011 وفي كل مرحلة من ساعتها، وفي كل معركة اشتبكنا فيها وتم التضييق علينا في اختيارين، ولا واحد منهم يشبه الثورة أو معسكرات لا تشبه الأقلية، اللي ارتضينا إننا نعمل ليها لجوء إنساني أبدي، هو ذاته الوضوح اللي بيعيد نفسه دلوقتي، فكل الورق دلوقتي على الترابيزة أو كما قال حسبو: "كل شيجين أنكشفن وبان"، و ده ما يجب استثماره والبناء عليه لو أمكن.. الوضوح ده مش هيستوجب بس إننا نطمن إن بالرغم من مسار الهزيمة أو سيناريو السقوط المحتمل، لكنه هيفرض علينا الحفاظ على ما تبقى من إيمان بالثورة وحمايته، حتى لو كان بالانسحاب الجزئي وإخلاء الملعب لعواجيز الدولة المسعورة، وهم نازلين يسخنوا بشورتات دبلان، يشوطوا في الناس وناسيين إن مفيش كورة أصلا.
الوضوح ده برضه هيخلينا واثقين إن الفعل الثوري في يناير، اللي ماتفهمش لغاية اللحظة دي.. إزاي اتحول لزخم ثوري، مش هيعيد نفسه تاني في يناير 2016 (يااااه.. هو مرت علينا السنين دي كلها)، يمكن لأن السيناريو اتهرس خلاص وإحنا شعب ملول بطبعه، ويمكن لأن الوعي اللي بيتشكل على مدار السنين بقى مدرك طبيعة اللحظة اللي واقفين فيها وطبيعة الرمال المتحركة اللي بنقاوم بيها السقوط المحتم للجميع.
على صعيد آخر (زي ما بيقولوا في نشرة التاسعة) النظام اللي تم التضحيك عليه ورفع الجزمة في وش رمزه في ميدان التحرير في يناير 2011، مش مختلف عن قرينه يا زواوي في 2016، يناير، وتمّ تشخيص الحالة بتسيب في المفاصل مع علامات قوية على وجود هلاوس سمعية وبصرية تسببت في ضلالات فكرية مفادها أن النظام الحالي عايز الجماهير الغفيرة المؤيدة له تنزل, للمرة اللي بطلنا نعدها، تثبت ولاءها ومباركتها الشعبية له، وتحتفل وتقدم قصرية ورد تترزع على دماغ أذرعة القوة.
المشهدة الحالي بيفكرك بعبد الفتاح القصري لما قرر في لحظة تجلي إنه يفرق راسه ويقول كتاكيت، لكنه اتحول لمريض بالهلاوس، وابتدى يصدق روحه وبيطلب من الجماهير إنها تصدق هلاوسه وتشتريها وتنزل تحارب معاه في معركته ضد الولاحاجة، أو ماتنزلش مش عارفين يعني.. أهو رجل بره ورجل جوه.. بس المهم خليكوا موجودين على العتبة يمكن نعوزكم.
يمكن اللحظة الخيالية الرومانسية اللي اتعاشت في يناير 2011 كانت عظيمة وعصية على التفكيك، لدرجة إننا بنخاف نقف عندها لتفقد بريقها وقداستها عند المؤمنين بيها، واللي بيدفعوا تمن ده لغاية دلوقتي، لكن الخيال هو اللي هنحتاجه علشان نعيد تشكيل الكورة اللي هنشوط بيها، ومين عارف؟! يمكن الجون ييجي.. مش علشان الجون في حد ذاته، ومش علشان إغراء الانتصار لأنه هيفرض علينا تضحيات -يمكن فوق احتمالنا- لكن علشان على الأقل نشوف إن ما آمنا به يطلع له معنى في نهاية الفيلم، لما اخترنا ننحاز ونلعب مع الخسران زي ما قال فارس في فيلم “الحريف”.
حقيقي إحنا مش مش بنختار نخسر، لأننا مهووسين بتعذيب الذات أو مدمنين للتيه في صحاري وطن تفنن القائمون عليه في إفقاره وتركيعه لأبعد مدى، أو لأننا يعني غاويين نخبط دماغنا في الحيطة، لكن لأن لحظة يناير اللي النظام بغباوته وناسه ودراعاته وإعلامه لا هيقدر يفهمها ولا يستوعبها.. كانت لحظة إدراكنا إن في الأصل مفيش حيطة، وإن خوفنا مالوش أساس، وإيماننا اللي بيتجدد أوقات بينقص وأوقات يزيد، لكنه على مدار الخمس سنوات، وروحها موجودة.
